زراعت او مالدارۍ وزارت اړوند د افغانستان د زراعتي څېړنو د انستیتوت عمومي رئیس د هلمند پوهنتون له رئیس او استادانو سره لیدنه وکړه
نېټه: ۱۴۴۶/۵/۱۴ هـ ق
د افغانستان د زراعتي څېړنو د انستیتوت عمومي رئیس الحاج مولوي نصرت الله "طلحه" او ورسره مل پلاوي د هلمند پوهنتون له رئیس شيخ الحدیث حافظ مولوي محمد نسیم "حقاني" رهبرۍ او استادانو سره د یوې مهمي لیدني په ترڅ کي د ګډو همکاريو، سرچینو شریکولو او د زراعت او مالدارۍ سکتور د ودي په اړه خبري وکړې.
په دې لیدنه کي چي د هلمند پوهنتون په ریاست مقام کي تر سره سول، دواړو لورو پر مختلفو اړینو مسایلو بحث وکړ.
د افغانستان د زراعتي څېړنو د انستیتوت عمومي رئیس الحاج مولوي نصرت الله "طلحه" د هلمند په ځانګړي ډول د کروندګرو د پرمختګ لپاره د مختلفو څېړنیزو پروګرامونو د پیلولو د اړتیا په اړه خبري وکړې. هغه وویل چي د زراعت او مالدارۍ په برخه کي د علمي څېړنو او تګلارو پلي کول ډير اړین دي. چي دا چاره به ددې سیمي او هیواد اقتصادي وضعیت ته وده ورکړي. دغه راز نوموړي وویل، هلمند په حقیقت کي د افغانستان د زراعت یوه مهمه سیمه ده او د دې ولایت د خلکو حق دی چي د عصري ټکنالوژی او نوي زراعتي تګلارو په مرسته خپل ځمکي آبادي کړي.
وروسته د هلمند پوهنتون د علمي چارو مرستیال پوهنیار محمد نعیم "دوست" راغلي پلاوي ته ښه راغلاست ووایه. هغه وویل موږ خوښ یو چي د هیواد د زراعتي څېړنو انستیتوت د هلمند پوهنتون سره خپلي اړیکي پراخوي. نوموړي د پوهنتون له لوري د همکارۍ ډاډ ورکړ او ویې ویل چي پوهنتون به د څېړنیزو پروژو او علمي هڅو په برخه کي د زراعتي څېړنو انستیتوت سره په فعال ډول همکار وي.
په دې ترڅ کي ښاغلي "دوست" د روان کال په جریان کي د هلمند پوهنتون له لوري د "نشه یي توکو پاک افغانستان ملي کنفرانس" یادونه وکړه. هغه وویل دا کنفرانس به د هیواد په کچه د زراعت او مالدارۍ نوي بدیلونه وړاندي کړي. موږ به د علمي مقالو له لاري د زراعت او مالدارۍ په برخه کي د نوو څېړنو او تخنیکونو په اړه معلومات وړاندي کړو، چي دا به زموږ د پوهنتون د علمي ظرفیتونو او د هېواد د زراعت په پرمختګ کي یو مهم ګام وي.
د دواړو لورو تر منځ د سرچینو شریکولو او د ګډو پروژو پر پلي کولو هم خبري وسوې.
په پای کي د هلمند پوهنتون د استادانو له لوري د زراعت او مالدارۍ په برخه کي یو شمېر وړاندیزونه د راغلي پلاوي سره شریک سول. دغه وړاندیزونه د زراعت په برخه کي د نوي ټکنالوژۍ پلي کول، کروندګرو ته د زده کړو زمینه برابرول او دغه راز د لابراتوارونو جوړول وه.
د افغانستان د زراعتي څېړنو د انستیتوت عمومي رئیس الحاج مولوي نصرت الله "طلحه" د دې وړاندیزونو ارزښت په ګوته کړ او د ملاتړ او همکارۍ ډاډ یې وړاندي کړ.
