.د هلمند پوهنتون رئیس په خپل کاري دفتر کي د پوهني رئیس سره و کتل
نن ورځ یکشنبه د هلمند پوهنتون رئیس شیخ الحدیث و التفسیر مفتي محمد شریف الله "ابو احمد" صاحب په خپل کاري دفتر کي د هلمند د پوهني رئیس الحاج مولوي محمد عوض "انصاري" صاحب سره وکتل. په دې کتنه کي د پوهنتون د محصلانو چارو مرستیال مفتي صدیق الله "همت" صاحب هم حضور درلود.
د کتني په پیل کي د هلمند پوهنتون رئیس شیخ الحدیث مفتي محمد شریف الله صاحب د محترم انصاري صاحب هرکلی وکړ او د هغه له لوري د تعلیم په ډګر کي د تلپاتي همکارۍ او هڅو څخه یې مننه وکړه.
وروسته دواړو لوریو د هلمند ولایت د علماء کرامو د عالیه او عالمیه مرحلو د اسنادونو د وېش او معاملې د لا اسانتیا لپاره پر اغېزمنو لارو چارو مفصل بحث وکړ. د دوی په وینا، دا موضوع به د لا ښه تنظیم او سهولت په موخه له مرکزي ادارې سره هم شریکه کړي.
همداراز په غونډه کي د هلمند پوهنتون د فارغ سوو محصلانو د کارموندني پر موضوع هم خبري و سوې. د پوهني رئیس محترم انصاري صاحب څرګنده کړه، چي هڅه کوي څو راتلونکي کي د هلمند پوهنتون شاوخوا ۲۰۰ بااستعداده فارغان د معارف ریاست د درسي چوکاټ په برخه کي جذب کړي، تر څو د ښووني او روزني بهیر نور هم پیاوړی سي.
د غونډي په دوام کي د محصلانو چارو مرستیال مفتي صدیق الله "همت" صاحب د مکاتبو زدهکوونکو ته د کانکور ازمویني د امادګۍ لنډمهاله کورسونو په اړه خپل نظر څرګند کړ. هغه و ویل، د هلمند پوهنتون اداره چمتو ده چي د معارف ریاست په همکارۍ د خپلو وړ او باتجربه استادانو په مټ د کانکور امادګۍ ځانګړي کورسونه تنظیم کړي، څو د کانکور ازمویني پر مهال د زدهکوونکو شته ستونزي راکمي او د بریا زمینه ورته نوره هم برابره سي.
