.هلمند پوهنتون کي د اسلامي نظام اساسات او فکري جګړې په اړه دوه ورځنی علمي سمینار پیل سو
نېټه: ۱۵/۶/۱۴۴۶ ه.ق
د هلمند پوهنتون د ناستو په تالار کښې د دعوت او ارشاد آمریت په همکارۍ دوه ورځنی علمي سمینار د دیني عالم ښاغلي شیخ محمد عمر فاروقي صاحب لخوا ددې پوهنتون ټولو محصلانو ته پیل سو، چي په کښې څلور موضوعات ( پرهیزګاري، فکري جګړه، د امام ابو حنفیه رح ژوند او د اسلامي نظام اساسات) شامل دي.
د سمینار په پیل کي د دعوت او ارشاد آمر ښاغلي مولوي عبدالقیوم ذاکر صاحب د انسان د ژوند هدف په اړه خبري وکړې. هغه وویل، چي د انسان حقیقي هدف د الله تعالی عبادت او د نېکمرغه اخروي ژوند لپاره چمتووالی دی.
نوموړي د دې ډول سمینارونو د ارزښت او په ټولنیز ژوند کي یې د اغېز په اړه خبري وکړې، هغه زیاته کړه چي علمي غونډي د محصلینو فکري ودي ته لار هواروي.
ورپسې دیني عالم ښاغلي شیخ محمد عمر فاروقي صاحب په خپلو خبرو کي د پرهیزګارۍ، فکري جګړې، د امام ابو حنفیه رح ژوند او د اسلامي نظام اساساتو په اړه تفصیلي بحث وکړ.
هغه د پرهیزګارۍ په اړه وویل، چي تقوا د فرد د معنوي ودي او د ټولني د اصلاح لپاره اساسي او ستر پانګه ده او د الله جل جلاله په نزد عزتمند تقواداره انسان دی او دغه راز یې د تقوا په اړه تشریحي معلومات وړاندي کړل.
د سمینار پر مهال نوموړي د فکري جګړې په اړه هم ګډونوالو ته پوهاوی ورکړ او ټینګار یې وکړ، چي مسلمانان باید د پردیو نظریاتو په وړاندي هوښیار پاتي سي او خپل ديني او کلتوري هویت وساتي.
په همدې لړکي هغه د امام ابو حنفیه رح د ژوند او لاسته راوړنو یادونه هم وکړه، ښاغلي شیخ فاروقي صاحب د امام ابو حنفیه رح د فقهي مکتب پر اهمیت خبري وکړې او د هغه د کارونو اغېزې یې د اسلامي نړۍ لپاره ارزښتناکي وبللې.
د سمينار په ترڅ کي دیني عالم د اسلامي نظام د اساساتو په اړه پراخ بحث وکړ، هغه د عدالت، مساوات او د شریعت د اصولو تطبیق په اړه معلومات شریک کړه او زیاته یې کړه، چي د اسلامي نظام پلي کيدل د ټولني د بقاء، سوکالۍ او پرمختګ لپاره اړین دي او د ټولني خلک او ځوانان باید په دې برخه کي خپل مسؤلیت درک او ترسره کړي.
باید یادونه وسي، چي په دې سمینار کي د همدې پوهنتون شاوخوا ۲۰۰۰ محصلان ګډون کوي، چي د دوو ورځو په اوږدو کي به سهار او ماپښین دوی ته په جلا جلا توګه یاد موضوعات وړاندي سي.
