.د هلمند پوهنتون له لوري د امنیه قومندانۍ منسوبینو ته پنځه ورځنی علمي سمینار تر سره سو
د هلمند پوهنتون د مسلکي پراختیا آمریت له خوا، د هلمند امنیه قومندانۍ منسوبینو ته پنځه ورځنی علمي او مسلکي سمینار وړاندي سو، چي موخه یې د پوهي لوړول، د اداري چارو لا سمون او د قانون د حاکمیت پیاوړتیا وه.
یاد سمینار د هلمند پوهنتون د مسلکي پراختیا آمریت او د هلمند امنیه قومندانۍ د اداري چارو معاونیت اړوند د ښووني او روزني مدیریت ترمنځ د ګډو همکاریو په پایله کي تر سره سو. دا علمي پروګرام د امنیه قومندانۍ د ښووني او روزني مدیریت د کلني پلان پر بنسټ ترتیب سوی وو.
په نوموړي سمینار کي د هلمند امنیه قومندانۍ د اداري او کشفي شعباتو مدیرانو، د ولسوالیو او کنډکونو قومندانانو او همدارنګه د امنیتي حوزو آمرینو فعاله ګډون درلود.
دغه پنځه ورځنی سمینار د هلمند پوهنتون د شرعیاتو پوهنځی د استاد، شیخ الحدیث و التفسیر مولوي عبدالهادي "حلیم" صاحب او د هلمند پوهنتون د مسلکي پراختیا د عمومي مدیر محترم نیاز محمد "احساس" صاحب له خوا وړاندي سو.
په یاد سمینار کي د اداري فساد سره د مبارزې، د قانون د حاکمیت، په چارو کي د شفافیت، اغېزمن مدیریت، عامه پالیسي او د ناسمو رواجونو د مخنیوي په اړه د عالیقدر امیر المؤمنین "حفظه الله" د ۱۷م ګڼه فرمان تشریح هم وسوه، چي ګډونوالو ته یې د شرعي، اداري او ټولنیزو مسؤلیتونو په اړه روښانه لارښووني وړاندي کړې.
د یادوني وړ ده چي د هلمند پوهنتون استادانو او اداري کارکوونکو، د خپل ټولنیز مسؤلیت له مخي، له دې مخکي هم په بېلابېلو علمي، اداري او ټولنیزو برخو کي ورته پروګرامونو کي فعاله ونډه اخیستې ده، چي دا چاره د پوهنتون او ټولني ترمنځ د اغېزناکي همکارۍ څرګندونه کوي.
