.د هلمند پوهنتون د رئيس په مشرۍ مشورتي بورډ پرانيستل سو
د هلمند پوهنتون د ریاست مقام په انګړ کي د هلمند پوهنتون د رئيس محترم شيخ الحديث مفتي محمد شريف اللّٰه ابو احمد صاحب په مشرۍ نوی مشورتي بورډ لمړنۍ ناسته، ددې پوهنتون د استادانو په ګډون ترسره سول، چي په دې ناسته کي ددې بورډ موخي او اهمیت په اړه خبري وسوې.
محترم ابو احمد صاحب څرګنده کړه، چي دا بورډ د پوهنتون د استادانو له ارزښتناکو تجربو او علمي صلاحیت څخه د ګټي اخیستني لپاره جوړ سوی دی. نوموړي وویل، چي دا بورډ به یوازي د هلمند پوهنتون په کچه نه، بلکي د ټول افغانستان د علمي، اداري او تعلیمي پرمختګ لپاره مهمي مشورې وړاندي کوي.
په دې ناسته کي، د بورډ د راتلونکو غونډو د څرنګوالي او مهالوېش، د پوهنتون اوسني وضعیت او اړتیاوو ته لنډه کتنه، د محصلينو د مطالعې، ځيرکتيا او فعاليتونو لپاره د غړو وړاندیزونه او د ګډونوالو خبري او وړاندیزونه تر بحث لاندي ونیول سوه.
د بورډ د غړو له لوري د پوهنتون د کیفیت لوړولو، د تدریس د طریقو د پراختیا، د محصلینو د مهارتونو او پیاوړتیا او د تعلیمي تګلارو د اصلاح په اړه هم مهم وړاندیزونه وړاندي سوه.
د ناستي په پای کي محترم مفتي ابو احمد صاحب، د ټولو ګډونوالو څخه مننه وکړه او ډاډ یې څرګند کړ، چي د بورډ وړاندیزونه به په پوره پاملرني اورېدل کیږي، چي تر تحلیل وروسته به یې پلي کېدو ته لاره هواریږي.
د غونډي په پای کي، د بورډ پر لایجې جوړولو هم بحث ترسره سو او مجلس په دعائیې سره پای ته ورسېد.
