.د هلمند پوهنتون په مرکزي مسجد کي د مشرتابه مقام د ۳۳م هدایت تشریح وړاندي سوه

نن د هلمند پوهنتون په مرکزي مسجد کي د مشرتابه مقام د فرمانونو د تشریح په لړ کي د ۳۳م هدایت تفصیلي تشریح ترسره سوه. په دې علمي او دیني غونډه کي د پوهنتون رهبري، د پوهنځیو رئیسانو، د څانګو امرینو او د بېلابېلو برخو استادانو ګډون کړی و.

دغه سمینار د هلمند پوهنتون د رئیس، الحاج شیخ الحدیث و التفسیر مفتي محمد شریف الله ابو احمد صاحب په وینا پیل سو.

نوموړي په خپله وینا کي د مشرتابه مقام مهم ۳۳م فرمان تشریح کړ، کوم چي د ۱۴۳۸ هـ ق د رجب په پنځمه نېټه صادر سوی و. په دې فرمان کي ټینګار سوی چي د مقدس جهاد موخه د الله جل جلاله د دین لوړول دي او د دعوت او ارشاد د جلب او جذب کمېسیون دنده لري، چي د امر بالمعروف او نهي عن المنکر بهیر پیاوړی کړي. همدارنګه، یو شمېر ادارو ته په دې برخه کي د لازمي همکارۍ دستور هم ورکړل سوی دی.

محترم ابو احمد صاحب د أمیر د مسؤلیتونو په اړه مفصل بحث وکړ او ویې ویل چي د اسلامي نظام أمیر باید د تقوا، اطاعت او دیندارۍ نمونه وي او داسي فرمانونه صادر کړي چي ملت له فساد، ورانۍ، بداخلاقۍ، تعصب او دیکتاتورۍ څخه وژغوري.

نوموړي امربالمعروف او نهي عن المنکر د ایماني، عقیدوي، مذهبي او بشري مکلفیت په توګه معرفي کړ. هغه د یوې بېلګي په توګه وویل: لکه څرنګه چي انسان د ناروغۍ پر مهال د تداوۍ لپاره روغتون ته ورځي، همداسي ټولنه هم د ناوړه او غیري شرعي اعمالو د پراخېدو پر مهال د اصلاح، دعوت او مخنیوي اړتیا لري، څو د فساد کچه راکمه او ټولنه د سوکالۍ او نېکمرغۍ لوري ته سوق سي.

نوموړي همداراز د قرآن کریم له مبارکو آیتونو یادونه وکړه او ویې ویل، چي الله تعالی د محمد صلی الله علیه وسلم امت د دې لپاره غوره بللی چي امربالمعروف او نهي عن المنکر ترسره کوي. هغه وړاندي زیاته کړه چي په ټولنه یا کورنۍ کي چي هر ډول منکر او بد عمل ووینو، د اصلاح هڅه یې زموږ ګډ مسؤلیت دی او د دغه فرمان د تطبیق زمینه برابرول د هر فرد دنده ده.

ښاغلي ابو احمد صاحب د حضرت عمر فاروق رضی الله عنه د مشهور قول څخه یادونه هم وکړه، چي صحابه کرامو ته یې ویلي وو: که په تاسو کي داسي څوک نه وي چي ما ته د خیر خبره وکړي، نو په تاسو کي خیر نسته او که زما خبره د خیر نه وي، په موږ کي هم خیر نسته.

په پای کي شیخ صاحب وویل، چي امیر، عالم، خطیب او استاد ټول د خیر د بلني مسؤلین دي او که د خیر خبره واورو، عملي کول او نورو ته رسول یې زموږ ګډه وجیبه ده. هغه د رسول الله صلی الله علیه وسلم هغه مبارک حدیث هم بیان کړ چي په کښې مؤمن د بل مؤمن لپاره هنداره ګڼل سوی او زیاته یې کړه چي مسلمانان یو د بل د اصلاح حق لري، څو د خیر او ښېګڼي لاره یو بل ته برابره کړي.

شیخ صاحب په خپلو خبرو کي وویل چي د پوهنتون د استادانو او تعلیمي مسؤلینو پر غاړه د محصل د شخصیت، اخلاقو، فکر، باور او عملي سیرت د جوړولو ستر امانت پروت دی. نوموړي ټینګار وکړ چي د محصل د روزني په هره مرحله کي صداقت، اخلاص، نرمي او د خیر بلنه باید د استاد د کار اصلي محور وي.

همدارنګه، هغه زیاته کړه چي د امربالمعروف او نهي عن المنکر د عملي کولو لپاره یوازي خبري بسنه نه کوي، بلکي په ادارو، ټولنو او کورنیو کي د سالم چاپیریال جوړول، د اصلاح غوښتني روحیه پیاوړې کول او د ستونزو د مخنیوي ګډ کار ته اړتیا ده. د هغه په وینا، هر فرد باید خپله دنده په اخلاص ادا کړي، ترڅو ټولنه په رښتیا د خیر، امن، سوکالۍ او دیني ارزښتونو په لور حرکت وکړي.

سمینار د دعا ئیې په ویلو سره  پای ته ورسېده.