.د هلمند پوهنتون لپاره د کادري روغتون کمپلیکس د مهندسۍ طرحه وړاندي سوه
د هلمند پوهنتون د کادري روغتون کمپلیکس د مهندسۍ لومړنۍ طرحه د کابل، له پولتخنیک پوهنتون څخه راغلي تخنیکي پلاوي له خوا د هلمند پوهنتون د رهبرۍ او تخنیکي کارکوونکو په حضور کي وړاندي سوه.
دغه مهمه ناسته د پوهنتون د ریاست مقام په انګړ کي ترسره سوه، چي په کښې د کابل پولتخنیک پوهنتون تجربه لرونکي انجینرانو، د هلمند پوهنتون رئیس، مرستیالانو، د پوهنځي رئیسانو، استادان او نور علمي او تخنیکي همکاران ګډون کړی و.
د انجینرۍ پلاوي له خوا د کادري روغتون کمپلیکس د جوړولو لپاره یوه شپږ منزله ودانۍ طرحه وړاندي سوه، چي د نړیوالو ساختماني معیارونو مطابق جوړه سوې ده. د طرحي له مخي، روغتون به له پرمختللو اسانتیاوو، معیاري تشخیص، درملني، اداري او تعلیمي برخو څخه برخمن وي.
په دې ناسته کي د هلمند پوهنتون د انجینرۍ پوهنځي استادانو او تخنیکي همکارانو هم خپل نظرونه، مشورې او وړاندیزونه له پلاوي سره شریک کړل، تر څو د طرحي د لا پیاوړتیا او تطبیق پر مهال له محلي اړتیاوو سره سم عمل وسي.
راغلی تخنیکي ټیم به د ودانۍ د موقعیت د تثبیت لپاره د ساحې تفصیلي سروې او همدارنګه جیو تخنیکي ازموینې هم ترسره کړي، ترڅو د ځمکي د جوړښت، استقامت او نورو اړینو معلوماتو پر بنسټ وروستۍ طرحه لا دقیق او د تطبیق وړ سي.
د پوهنتون رهبرۍ د راغلي تخنیکي ټیم له زحمتونو څخه مننه وکړه او د دې پروژې پیل یې د سیمي او پوهنتون د بنسټیز پرمختګ لپاره مهم ګام وباله.
باید وویل سي، چي د طرحي وروستۍ منظوري به له اړوندو ادارو سره د همغږۍ له لاري تر لاسه کيږي او وروسته به د عملي کار پیل ته زمینه برابره سي.
