.د لوړو زده کړو وزارت د کارکوونکو چارو رئیس هلمند پوهنتون ته تشریف را وړی
د لوړو زده کړو وزارت یو پنځه کسیز هیئت، د کارکوونکو چارو رئیس په مشرۍ هلمند پوهنتون ته را رسېدلي، دغه هیئت د پوهنتون د اداري مراسلاتو او اړوندو برخو ارزونه وکړه او د اداري د اصلاحاتو لپاره یې خپلي موندنې شريکي کړې.
له ارزونې وروسته هیئت د پوهنتون کارکوونکو ته یو ورځنی روزنیز ورکشاپ وړاندي کړ، چې په کښې مهم موضوعات تر بحث لاندي ونیول سوه . د ورکشاپ اصلي موضوعات د لوړو زده کړو وزارت تشکیلاتي او اداري واحدونو ویش، د بستونو احصایې، د اداراتو د تشکیلاتي طرحو اساسي اصول، د تشکیل د بدلون عوامل، د دندو لایحې شکلي او تخنیکي جوړښت، د نوي کارکوونکو د استخدام پروسه او ډولونه، او د کارکوونکو د تحصیلي کچې مراحل وو.
د ورکشاپ یوه بله مهمه موضوع د اداري مراسلاتو اړوند ګټورو معلوماتو شریکول وه، چي د پوهنتون د کارکوونکو لپاره یې د کاري آسانتیاوو او رسمي اړیکو د ښه والي او پیاوړتیا په برخه کي مهم رول درلودی.
د لوړو زده کړو وزارت دا ډول ارزونې او روزنیز پروګرامونه د ادارو د ښه والي او معیاري کولو لپاره اساسي رول لري، چي موخه یې د تحصیلي ادارو لا پرمختګ او د کارکوونکو مسلکي ظرفیت لوړول دي.
