د شرعیاتو پوهنځي د فارغ محصلانو د پایلیکونو لړۍ پیل سول
نن سې شنبه د هلمند پوهنتون د غونډو په تالار کي د شرعیاتو پوهنځي د لمړۍ دورې د زده کړیالانو د پایلیکونو دفاعوي د یوې غونډي په ترڅ کي پیل سول.
په غونډه کي د هلمند پوهنتون رئیس ښاغلي شیخ حافظ محمد نسیم حقاني، د پوهنتون مرستیالانو، د پوهنځيو رئیسانو، استادانو، اداري کارمندانو او محصلانو ګډون درلود.
د غونډي په پیل کي د هلمند پوهنتون رئیس ښاغلي شیخ حافظ محمد نسیم حقاني د شرعیاتو پوهنځي د لمړۍ دورې محصلانو د تعلیمي دور د بشپړولو مبارکي وړاندي کړه او زیاته یې کړه، چي نور نو وخت را رسېدلی، چي مسؤلیت ومنۍ او د هیواد د ابادۍ او بیارغوني لپاره مټي را ونغاړۍ.
دغه راز د یاد پوهنتون د شرعیاتو پوهنځي د اسلامي ثقافت څانګي استاد ښاغلي مفتي شیراحمد عاجز هم په غونډه کي وینا وکړله. هغه د پوهنتون د کاري ټیم هلي ځلي وستایلې او له محصلانو یې وغوښتل: پوره هیله ولرئ، تاسي یاست، چي نوښتونه به رامنځته کوئ او د هیواد د ګټي لپاره به کار کوئ.
تر ویناوو وروسته د محصلانو له لوري د خپلو مونوګرافونو د دفاع لړۍ پیل سول، چي تر راتلونکي اوونۍ به دوام ومومي.
د یادولو وړ ده، چي هلمند پوهنتون د شرعیاتو پوهنځي په ۱۳۹۸ لمریز کال کي تاسیس سوه، چي دا یې د لمړۍ دورې د لسګونو محصلانو د څېړنیزو پروژو د فاع لړۍ ده.
