.په هلمند پوهنتون کي د کائناتو او انسان د تخلیق، د سنتو اتباع او محرماتو په اړه علمي سمینارونه وړاندي سول
نن د هلمند پوهنتون د غونډو په تالار کښي د دعوت او ارشاد آمریت او د مسلکي پرمختیا مرکز په ګډو همکاریو یو لړ اصلاحي او علمي سمینارونه وړاندي سول، چي په کښې د پوهنتون رهبري، استادانو، اداري کارکوونکو او سلګونو محصلینو ګډون کړی وو.
دغه سمینارونه د اسلامي ارزښتونو د پیاوړتیا، د فکري اصلاح او علمي بصیرت د لوړولو لپاره پلان سوي دي، چي په کښي د قرآن کریم، نبوي سنتو او د معاصرو دیني مسایلو پر بنسټ مهم موضوعات وړاندي سول.
د سمینار لومړۍ موضوع د کائناتو تخلیق وو، چي د مسلکي پرمختیا مرکز آمر مولوي عبدالحمید هلمندي صاحب لخوا وړاندي سو.
مولوي هلمندي صاحب د کائناتو درو طبقو، د سیارو، ستورو، سپوږمۍ او نورو هستیو په اړه تفصیلي بحث وکړ او ویې ویل، چي اسلامي علوم د معاصر ساینس له حقایقو سره ژوره اړیکه لري، خو سرچینه یې د وحي علم دی. هغه د ساینس پر هغو نظریو اسلامي استدلال وکړ، چي د نوموړي دین سره په مخالفت کي دي.
ورپسې د دعوت او ارشاد آمر مولوي عبدالقیوم ذاکرصاحب د انسان تخلیق تر عنوان لاندي وینا وکړه. نوموړي وویل، قرآن کریم انسان اشرف المخلوقات ګڼي او د هغه خلقت د الله تعالی د قدرت لویي نښي دي.
هغه د ساینسپوهانو هغه نظریات چي د انسان خلقت یې د طبیعت له تطابق سره تړلی، د قرآني دلایلو په رڼا کي رد کړل.
مولوي ذاکر صاحب زیاته کړه، د نسل تناسل، شکل او د وجود بقا د خدای جل جلاله قدرتونه دي او د تکامل دا دوره د چاپیریالي تطابق او تدریجي تغیر سره اړیکه نه لري.
د هلمند پوهنتون رئیس، شیخ الحدیث و التفسیر مفتي شریف الله ابو احمد صاحب هم په غونډه کي ګډونوالو ته خبري وکړې. هغه وویل، ډيرو خلکو د قرآن کریم له برکته د دنیا امپراطورۍ ګټلي او د سنتو د پیروۍ برکت دا دی، چي انسان د خالق او مخلوق دواړو خوښي تر لاسه کوي.
ښاغلي ابو احمد صاحب ګډونوالو ته سپارښتنه وکړه، چي د نبي کریم صلی الله علیه وسلم سنتونه دي ژوندي وساتي، ځکه چي دا سنتونه یوازي روح ته سکون نه ورکوي بلکي په رزق کي هم برکت راولي.
د هلمند ولایت د علماؤ شورا غړي شیخ الحدیث مولوي عزیزالله صاحب د ایمان لغوي او اصطلاحي تعریف وړاندي کړ او د ایمان اړوند ټول فکري، عملي او عقیدوي اړخونه یې مفصل بیان کړل.
وروسته، د شیخ الحدیث مولوي محمد سعید سعیدي صاحب لخوا ددې غونډي وروستۍ موضوع وړاندي سوه، چي په کښي د قرآن کریم په رڼا کي د محرماتو، طلاق او نکاح اړوند احکام تشریح سول. هغه وویل، د ټولني د بقا لپاره د محرماتو پېژندنه، د نکاح د اهمیت درک او د طلاق حدودو ته پام کول او په اړه یې پوهه ترلاسه کول د هر فرد لپاره لازم او اړین دي.
باید یادونه وسي، چي دا علمي او اصلاحي سمینارونه به تر سبا یکشنبې دوام ولري، چي په دې جریان کي به د پوهنتون ټولو استادانو، کارمندانو او محصلینو ته په دوه وختونو کي سهار او ماسپیښن بېلابېل موضوعات وړاندي سي.
