.د هلمند پوهنتون کارمندانو ته د اسلامي ادارې او مدیریت په اړه درې ورځنى روزنیز سمینار پیل سو
نېټه: ۲۷/۶/۱۴۴۶ هـ.ق
نن یکشنبه د هلمند پوهنتون د غونډو په تالار کي د مسلکي پرمختیا مرکز په همکارۍ د هلمند اداري اصلاحاتو او ملکي خدمتونو ریاست په ملاتړ د دې پوهنتون کارمندانو ته د اسلامي اداري او مدیریت، پلان جوړوني، د وخت مدیریت، نظارت او مراقبت په اړه درې ورځنی روزنیز سمینار پیل سو.
دا سمینار د پوهنتون د اداري چارو د ښه والي او په اسلامي روحیه د کارمندانو د مسلکي وړتیا لوړولو په موخه پیل سوی، چي د سمینار په پرانیست غونډه کي د هلمند اداری اصلاحاتو او ملکي خدمتونو آمر ښاغلي الحاج مولوی اغاصاحب وینا وکړه.
هغه په خپلو خبرو کي د دا ډول روزنیزو پروګرامونو پر اهمیت سربیره یو لړ اسلامي لارښووني هم وکړې، نوموړي وویل، د علم او مسلک ترڅنګ د تقوا او امانتدارۍ په شتون کي خدمت ترسره کېدای سي. هغه له ګډونوالو غوښتنه وکړل، چي په چارو کي آمین او اخلاصمند و اوسي.
ورپسې ددې پوهنتون د اسلامي ثقافت څانګي استاد نامزد پوهنیار الحاج مولوي عتیق الله همایون صاحب سمینار را پیل کړ، چي د اسلامي ادارې او مدیریت پر پیژندنه، په اسلامي دورو کي د ادارې او مدیریت ډول او د هغه پر ځانګړتیاوو یې ګډونوالو ته معلومات وړاندي کړل.
باید وویل سي، چي یاد سمینار به د راتلونکو دوو ورځو لپاره نور هم دوام ولري، چي د اسلام په رڼا کي به پر پلان جوړونه، د وخت مدیریت، نظارت او مراقبت په اړه علمي او عملي معلومات ګډونوالو ته وړاندي سي.
