.د ښووني او روزني پوهنځي علمي او اداري فعاليتونه و ارزول سوه
د پوهنځیو د ارزونو د لړۍ په دوام، نن چهار شنبه د هلمند پوهنتون رئیس، شیخ الحدیث و التفسیر مفتي محمد شریف الله ابو احمد صاحب او مرستیالانو د دې پوهنتون د ښووني او روزني پوهنځي څخه لیدنه وکړه او د یاد پوهنځی علمي او اداري چاري یې له نیږدې و ارزولې.
د ارزوني پر مهال د یاد پوهنځي د حاضرۍ او ثبت کتابونه، راپورونه، کاري پلانونه، پرېکړي، اجنډاوې او نور اړوند اسناد وکتل سول او د تدریسي بهیر د کیفیت، د استادانو د تدریس طریقه او د محصلانو د علمي پرمختګ څرنګوالی هم په دقت سره وارزول سو.
ښاغلي ابو احمد صاحب د یاد پوهنځي له مسؤلینو او استادانو څخه مننه وکړه او ویې ویل، چي د ښووني او روزني پوهنځی د ټولني د فکري او علمي بنسټونو په پیاوړتیا کي خورا مهم رول لري. نوموړي زیاته کړه چي د همدې پوهنځي له لاري راتلونکي ښوونکي او روزونکي روزل کېږي، نو ځکه اړینه ده چي استادان د معیاري تدریس تر څنګ د محصلانو د فکري روزني، علمي څېړني، مسلکي وړتیاوو او د ښوونیزو مېتودونو په پیاوړتیا کي ځانګړې پاملرنه وکړي، څو داسي وړ او متعهد ښوونکي وروزل سي چي وکولای سي د هیواد د ښوونیز نظام د پرمختګ او د راتلونکو نسلونو د سالمي روزني لپاره اغېزمن خدمتونه ترسره کړي.
بايد وويل سي چي دا ډول ارزوني د علمي چارو د لا پیاوړتیا او د پوهنتون د اداري او تدریسي بهیر د لا ښه والي په موخه ترسره کیږي.
