د هلمند پوهنتون رئیس د بُست خصوصي پوهنتون څخه لیدنه وکړه.
نن دوشنبه د هلمند پوهنتون رئیس، شیخ الحدیث و التفسیر مفتي محمد شریف الله ابو احمد صاحب د یاد پوهنتون د رهبرۍ پلاوي په ملتیا د بُست خصوصي پوهنتون څخه رسمي لیدنه وکړه.
د لیدني پر مهال د بُست پوهنتون له رهبرۍ سره ځانګړې غونډه ترسره سوه، چي پکښې د لوړو زده کړو وزارت له لوري د مقرراتو او اصولو پر عملي تطبیق ټینګار وسو. د هلمند پوهنتون رئیس وویل چي د امراوو له خوا د وخت په وخت راتلونکو اصولو مراعات د تحصیلي نظام د معیاري کېدو لپاره اړین دي.
نوموړي په خپلو خبرو کي محصلین یو مهم امانت وباله او زیاته یې کړه چي د هغوی اخلاقي روزنه او علمي پیاوړتیا د پوهنتونونو د رهبرۍ او استادانو د اساسي مسؤلیتونو څخه دي.
په همدې غونډه کي د بست پوهنتون رهبرۍ خپل وړاندیزونه او نظریات شریک کړل، چي د هلمند پوهنتون رئیس یې د ارزوني او عملي کېدو ډاډ ورکړ.
ورپسې ښاغلي ابو احمد صاحب، د بست پوهنتون محصلینو ته په یوه جلا غونډه کي وینا وکړه او له هغوی یې وغوښتل، چي په خپلو اړوندو څانګو کي د تخصص تر کچي ځانونه ورسوي.
نوموړي ټینګار وکړ چي د هیواد د پرمختګ او ثبات اساس پر علمي کدرونو او مسلکي ځوانانو ولاړ دی.
هغه وړاندي زیاته کړه چي اسلامي امارت د خپلو پالیسیو په چوکاټ کي د وړ کدرونو د جذب او د هغوی څخه د هیواد د ځان بسیایني په برخه کي د ګټي اخیستني له پاره ځانګړې تګلاره لري او محصلین باید د خپلو زده کړو له لارې د دین او هیواد خدمت ته چمتو سي.
د سفر په پای کي د هلمند پوهنتون د رهبرۍ پلاوي د بست پوهنتون د تدریسي ټولګیو، لابراتوارونو، کتابتون، کمپیوټر لېب او نورو اړوندو اسانتیاوو څخه هم لیدنه وکړه او د بست پوهنتون د مسؤلینو څخه یې مننه وکړه، د محصلینو د مسلکي روزني له پاره یې د اړتیا وړ امکانات برابر کړي دي.
د یادوني وړ ده، چي د لیدنو دا لړۍ به نوره هم ادامه لري او راتلونکي کي به د نورو خصوصي پوهنتونونو څخه هم علمي لیدني وسي.
