.هلمند پوهنتون کي د نړیوالو ژبو د ازمويني بورډ لومړنۍ پرانیستغونډه ترسره سول
په هلمند پوهنتون کي د علمي چارو معاوینت تر چتر لاندي د انګليسي ژبي او ادبیاتو څانګي آمريت په ابتکار او همکارۍ د لومړي ځل لپاره هلمند پوهنتون کي د نړیوالو ژبو د ازمويني بورډ پرانیستل سو.
یاده غونډه چي د قرآنکریم د مبارکو آیاتونو په تلاوت سره پیل سوه، د بورډ آمر او د پوهنتون د علمي چارو مرستیال پوهنیار محمد نعيم دوست د یاد بورډ د ارزښت او جوړېدو د اړتیا په هکله ګډونوالو ته وينا واورول.
ورپسې د ښووني او روزني پوهنځي د انګليسي څانګي آمر پوهنیار سید حکمت الله سیفي، د ياد بورډ د طرزالعمل په هکله معلوماتي سمینار وړاندي کړ. ښاغلي سیفي و ویل: دا بورډ به د هیواد په کچه د انګليسي ژبي د سويې معلومولو شفافي ډیجیټلي ازمويني اخلي او بریالي ګډونوالو ته به په نړيواله کچه منل سوی او معتبر د انګليسي ژبي سند ورکول کيږي، ترڅو وکولی سي، د یاد سند څخه خپل په علمي، تعليمي او وظيفوي ډګرونو کي استفاده وکړي.
همداراز، استاد سیفي هیله مندي وښودل چي په نږدې راتلونکي کي به د عربي ژبي په برخه کي هم د ورته ازمویني لړۍ د بورډ په مرسته راپیل کړي، چي استادانو، محصلانو او عامو کسانو ته به ګڼي آسانتياوي مهیا کړي.
باید یادونه وسي، چي هلمند پوهنتون تر دې وړاندي د خپلو محصلانو د ژبنیزو مهارتونو د لوړولو لپاره د ملي او نړیوالو ژبو یو کلن تقویتي کورسونه پیل کړي، چي په مرسته یې سلګونه محصلان په وړیا ډول روزنه ترلاسه کوي.
