.په هلمند پوهنتون کي د زده کړیالانو د پایلیکونو دفاع غونډي پیل سوې
نن شنبه د هلمند پوهنتون د غونډو په تالار کښي د پایلیکونو د دفاع غونډو د پیل په لړ کي لمړی د اقتصاد پوهنځي زده کړیالانو خپلي څېړنیزي موندني او پایلي د ژوري هئیت په حضوري کي وړاندي کړې.
په دې غونډه کی چي د پوهنتون رهبرۍ، د پوهنځي رئیسانو استادانو، محصلینو او میلمنو حضور درلود، د غونډي پیلیزه وینا د هلمند پوهنتون رئیس شیخ الحدیث مفتي شریفالله ابو احمد صاحب وکړل، ښاغلي ابو احمد صاحب د اقتصاد او علمي څېړنو د اهمیت، د محصلینو د باکیفیته روزني او د اقتصاد پر ارزښت خبري وکړې. نوموړي وویل چي د هیواد اقتصادي ستونزي د علمي فکر له لاري حلېدلی سي او پوهنتونونه باید داسې کادرونه وروزي چي هم تخصص ولري، هم اخلاقي او دیني اصول وپالي.
ورپسې د اقتصاد پوهنځي رئیس ښاغلي پوهنیار محمد نعیم کاکړ د مسلکي کادرونو د ګمارني او د دوی د خدمت د مؤثریت پر اهمیت خبري وکړې.
د غونډي په بهیر کي د مالي او بانکي څانګي استاد ښاغلي پوهنیار حکمتالله خادم د اقتصاد پوهنځي د څېړنیزي کمېټې د تېر کال د لاسته راوړنو راپور وړاندي کړ.
د محصلینو په استازولی ښاغلي مجیب الرحمن احمدي د دوی د تیر یو کلن څېړنیز مزل تجربې او لاسته راوړني شریکي کړې او د پوهنتون د رهبرۍ او اقتصادي پوهنځي له استازو څخه، دوی ته په دې علمي بنسټ کي د فرصتونو او سهولتونو د رامنځته کېدو په موخه مننه وکړل.
په غونډه کي د یاد پوهنځي زحمتکښ او ژمن استادان او کارکوونکي په ستاینلیکونو سره توصیف سول او ورپسې د محصلینو له لوري د پایلیکونو دفاع په لاندینیو سرلیکونو پیل سوه.
(۱. د افغانستان په اقتصادي وده کي د تاثیر لرونکو عواملو څېړل، ۲. په هلمند ولایت کي د اسلامي صکوکو پر درک باندي د پوهاوي، پوهي او مذهبیت اغېزې، ۳. د انلاین او حضوري زدهکړو په اړه د محصلینو د ذوق تحلیل ، ۴. د کړنو د ارزوني اغېزې پر خدماتو، ۵. د کارمندانو پر فعالیت باندي د رهبرۍ د طریقو اغېزې، ۶. خصوصي کېدنه او اغېز یې پر اقتصادي وده باندي).
د علمي هیئت له خوا د هر محصل دفاع وارزول سوه او لازمي اصلاحي سپارښتني ورته وسوې.
د غوندي په وروستي برخه کي د پوهنتون د مالی او اداری چارو مرستیال ډاکټر سمیع الله سعید د زده کړیالانو او د پوهنځي د غړو زحمتونه وستایل او د لازمو امکاناتو او فرصتونو د پراختیا په برخه یې دوی اطمینان وړاندي کړ.
باید یادونه وسي، چي هلمند پوهنتون کي د شپږو پوهنځيو او شلو څانګو محصلانو خپل څېړنیزي پروژې بشپړي کړي، چي په ترتیب سره به د هري پوهنځي زده کړیالان د مهالویش سره سم د ژوري هیئت په حضور کي خپل پایلیکونه دفاع او وړاندي کړي.
غونډه په دعاییې وینا سره پای ته ورسېده.
