.د ستراتیژیک پلان د تطبیق لپاره د کلني پلان جوړولو درې ورځنی ورکشاپ پیل سو
نن د هلمند پوهنتون د علامه خطابي بستي رحمهالله د غونډو په تالار کښې، د ښووني او روزني پوهنځي له لوري، د مسلکي پرمختیا آمریت په همکارۍ، د ستراتېژیک پلان د تطبیق لپاره د کلني پلان جوړولو په اړه درې ورځنی ورکشاپ پیل سو.
په یاد ورکشاپ کي د پوهنتون د بېلابيلو پوهنځیو رئیسانو، آمرینو او استادانو ګډون درلود. ورکشاپ د ښووني او روزني پوهنځي د استاد نوماند پوهنیار ښاغلي نیازمحمد پوپل له لوري پیل سو، نوموړي، ددې ورکشاپ موخي، د ستراتیژیک پلان د مؤثر تطبیق لپاره د کلني پلان د جوړولو، تنظیم او عملي پلي کولو په برخه کي د استادانو مسلکي پوهه او مهارتونه پیاوړي کول یاد کړل.
ښاغلي استاد، د ورکشاپ په پیل کي وویل، پلان، عمل او نظم د بریالي ماموریت راز دی او هره اداره، چي دا درې ټکي په عمل کي ترسره کړي، هغه به حتمي پرمختګ ته ورسېږي.
د ورکشاپ د دریو ورځو په بهیر کي به ګډونوالو ته د ستراتیژیک پلان اړوند مهم مفاهیم او علمي موضوعات تشریح سي. دغه راز د لیرلید، رسالت او اهدافو ترمنځ اړیکه او د هغوی علمي تعریفونه به ورته روښانه کړل سي.
همدارنګه د ستراتیژیک پلان تعریف، اهمیت او د پوهنتوني نظام په پرمختګ کي یې رول ددې ورکشاپ د بحث مهمه برخه ده او د ستراتیژۍ د جوړښت او تطبیق لاري، د پلانونو ډولونه، د ستراتیژیک پلان د تطبیق لپاره، د کلني پلان پیژندنه او د اسنادو د مستند کولو پروسه به هم تشریح سي.
په ورکشاپ کي به د عملي تمرینونو له لاري د هدفونو ټاکل، د مهال وېش تنظیم، د دندو وېش او د ارزوني میکانیزمونه روښانه کړل سي، تر څو ګډونوال وکولای سي، د خپلو پوهنځیو د کلنیو پلانونو جوړولو په برخه کي د لا اغېزمنو کړنو وړتیا ترلاسه کړي.
