.د هلمند پوهنتون رئیس د شرعیاتو پوهنځی د محصلینو او استازو سره وکتل
نن ورځ پنجشنبه د هلمند پوهنتون رئیس، شیخ الحدیث و التفسیر مفتي محمد شریف الله ابو احمد صاحب، په خپل کاري دفتر کي د یاد پوهنتون د شرعیاتو پوهنځی له یو شمېر محصلینو او د هغوی له منتخب استازو وکتل.
یاده غونډه د محصلینو د ستونزو، غوښتنو او وړاندیزونو د اورېدو په موخه جوړه سوې وه. په پیل کي محصلینو او نماینده ګانو د تدریسي بهیر، درسي اسانتیاوو او یو شمېر نورو اړوندو موضوعاتو په اړه خپل نظرونه او وړاندیزونه شریک کړل.
د پوهنتون رئیس صاحب، د محصلینو خبري په دقت واورېدې او د هغوی له مثبتو نظریاتو او احساس مسؤلیت څخه یې مننه وکړه.
نوموړي ټینګار وکړ، چي د پوهنتون اداره د محصلینو د مشروع غوښتنو اورېدو او حل ته ژمنه ده او هڅه به وکړي، څو د شته امکاناتو په چوکاټ کي یادي ستونزي هواري کړي.
ښاغلي رئیس صاحب زیاته کړه، چي د پوهنتون پرمختګ د استادانو، محصلینو او ادارې د ګډو هڅو او همکارۍ په مټ امکان لري، چي په وینا یې خوښ دی چي محصلین ورسره د پوهنتون د علمي ارتقاء له پاره مهمي مشورې او وړانديزونه شریکوي.
