د چاپیریال ساتني د اوونۍ په پار معلوماتي پرزینټېشن وړاندي سو
نن یکشنبه په هلمند پوهنتون کي د چاپیریال ساتني د اوونۍ د لمانځ غونډي په لړ کي معلوماتي پرزينټېشن وړاندي سو.
یاده غونډه چي د هلمند پوهنتون د غونډو په تالار کي وه، د مسلکي پراختیا مرکز په ګډي همکارۍ په داسي حال کي چي د یاد پوهنتون رهبرۍ، د لښکرګاه ښاروالۍ او د چاپیریال ساتني ریاستونو استازو، استادانو، کارمندانو او محصلانو حضور درلود، د چاپیریال ساتنۍ د اوونۍ د لمانځني په پار معلوماتي پرزینټېشن وړاندي سو.
د پیل وینا د چاپیریال ساتني رياست د اړیکو او اطلاعاتو لوی مدیر ښاغلي سید احمد نظري وکړل او د چاپیريال ساتني په اړه یې خبري وکړې.
ورپسې د چاپیریال ساتني سرپرست رئیس ښاغلي سمیع الله سالم د چاپیریال ساتني په برخه کي د خلکو د مسؤلیتونو په اړه وینا وکړه.
بیا د هلمند پوهنتون علمي مرستیال ښاغلي پوهنیار محمد نعیم دوست د پاک چاپیریال د رامنځته کولو او په ټولنه کي یې د ارزښت په باب وینا وکړله.
علمي مرستیال وویل:”چیري چي سمسورتیا وي، هلته به ژوندي موجودات ته د اوسېدو معيارونه مهیا وي، نو لازمه ده، چي د خپل ژوند د بقاء لپاره د پاک چاپیریال په رامنځته کولو کي هر فرد خپل مسؤلیت وپیژنو. “
د غونډي په لړ کي د نوموړي پوهنتون د مسلکي پراختیا مرکز امر ښاغلي مولوي عبدالحمید هلمندي د اسلام له نظره د چاپیریال ساتني پر موضوع رڼا واچوله.
ښاغلي هلمندي وویل :”اسلام پاکي د ایمان برخه ګڼلې، پاک چاپیریال رامنځته کول يواځي ټولنیز مسؤلیت نه دي بلکي د اسلام مبارک دین خلک په پاکۍ امر کړي دي. “
په وروستیو کي د انجینري پوهنځي د استاد ښاغلي پوهنمل عبدالولي هجران له لوري د چاپیریال ساتني معلوماتي پرزينټېشن وړاندي سو. چي په کښې د چاپیریال پیژندنه، د اقلیم بدلون، د رامنځته کېدو عوامل او ځيني نورو مطالب ګډونوالو ته روښانه سول.
د یادولو وړ ده، چي په دې وروستیو کي په نړیواله کچه اقلیمي بدلون د وچکالۍ او هوا د تودوخي د کچي د ډیرښت سره سره ګڼي نوري ستونزي هم رامنځته کړي، چي د ژونديو موجوداتو پر ژوند یې ډیر منفي تاثیر پر آيښی دی.
نېټه: ۸/۱۱/۱۴۴۵ ه.ق
هلمند پوهنتون
د عامه پوهاوي او نشراتو لوی مدیریت
