د ښووني او روزني پوهنځي د ګڼو څانګو د ۱۵۰ زده کړيالانو د پايليکونو دفاع پيل سول
نېټه ۱۴۴۵/۱۱/۷ ه.ق کال
نن چهارشنبه د هلمند پوهنتون د زده کړیالانو د مونوګرافونو/پایلیکونو دفاع لړئ د یوې غونډي په ترڅ کي پیل سول.
یاده غونډه چي د هلمند پوهنتون د غونډو په تالار کي وه، د هلمند پوهنتون رئیس الحاج شیخ حافظ محمد نسیم حقاني، د پوهنتون مالي او اداري مرستیال ښاغلي ډاکټر سمیع الله سعید په ګډون د ګڼو پوهنځیو ريسانو، استادانو او اداري کارمندانو په شتون کي دښووني او روزني پوهنځي بیلابیلو څانګو زده کړیالانو د پایلیکونو د دفاع لړۍ پیل سول.
د غونډي په بهير کي د یاد پوهنتون رئیس ښاغلي شیخ حقاني صاحب زده کړیالانو د مبارکۍ ترڅنګ وویل: (( چي د دندي ترلاسه کولو لپاره د زده کړي کول معیار ونه ګرځوي، بلکي د اسلام او هیواد ته د چوپړ او پرمختګ په هیله خپلو استعدادونو ته وده ورکړئ. هغه وویل، با ظرفیته ځوانان دي، چي ټولنه یې د پرمختګ لپاره ځانته جذبوي.
نوموړي زیاته کړه، چي د دولت د هڅو لمړی معیار د اسلامي ټولني د جوړښت سره سره د استعداد لرونکو ځوانانو روزنه او وده ده. په همدې حال کي یې د علومو ارزښت ته په اشاره وویل، لکه څنګه چي، رڼا ده، چي تیاري له منځه وړي، علوم دي، چي هیواد د ځان بسیایني لور ته په خوځښت راولي.))
ورپسې د نوموړي پوهنتون د ښووني او روزني پوهنځي رئیس ښاغلي پوهنمل وحیدالله امیري د اسلام له نظره د څېړني پر ارزښت خبري وکړې او د نړۍ د هیوادنو د پرمختیا لوی راز یې تحقیقات وبلل.
تر ویناوو وروسته د څېړنو-پایلیکونو د دفاع ټولګه پیل سول، چي د یاد پوهنځي د پښتو او انګلیسي ژبي او ادب، فزیک، کیمیا، ریاضي او بیولوژي څانګو زده کړیالانو خپل تحقیقي راپورونه په نوبت سره وړاندي کړل او د نن غونډه د دعا په ویلو سره پای ته ورسېدل.
