هلمند پوهنتون کي د لمانځه د اقامې په اړه د أمیرالمؤمنین حفظه الله تعالی د فرمان او توصیو سمینار پیل سو
نېټه: 1446/2/23 هـ .ق
نن سې شنبه د هلمند پوهنتون د غونډو په تالار کي د لمانځه د اقامې په هکله د عالیقدر أمیرالمؤمنین شیخ القرآن والحدیث مولوي هبة الله اخندزاده حفظه الله تعالی د فرمان او توصیو د تشريح اړوند مهم سمینار د ۳ ورځو لپاره پيل سو.
په دې سمينار کي د هلمند پوهنتون رهبرۍ، استادانو، اداري کارمندانو او خدماتي کارکوونکو ګډون درلود.
د پيل وينا کي د هلمند پوهنتون رئيس ښاغلي شيخ حافظ مولوي محمد نسيم حقاني له ټولو ګډونوالو وغوښتل، چي د أميرالمؤمنين حفظه الله فرمانونه او توصيې پر ځانونو تطبیق کړي.
وروسته د هلمند پوهنتون د شرعياتو پوهنځۍ استاد محترم شيخ مولوي عبدالهادي حليم د أمير المؤمنين شيخ القرآن و الحديث مولوي هبة الله اخندزاده حفظه الله تعالی د لمانځه د اقامې فرمان چي په 4 مادو او 10 توصيو کي وو، ګډونوالو ته لمړۍ برخه وړاندي کړه.
د فرمان لمړۍ ماده، اولي فقرې کي راغلي، چي په جماعت سره د لمانځه اقامه کول شرعاً واجب او د جماعت تارک د تعزیر مستوجَب دی. دوهمه فقره کي لیکل سوي، چي د وزارتونو او امارتي ادارو منسوبین او مسؤلین شرعاً مکلف دي، چي دلمانځه پابندي او په جماعت سره یې اقامه وکړي. دوهمه ماده کي ویل سوي، چي د تارک جماعت د تعزیر په هکله د اړوندي ادارې مسؤل موظف دی.
په پاته نورو مادو کي د ارشاد، حج اوقافو وزارت مکلفیتونو ته اشاره سوې او وړاندي لیکل سوي، چي دغه فرمان د توشیح له نېټې څخه نافذ او په رسمي جریده کي دي له ضمیمې سره یو ځای خپور سي.
د یادولو وړ ده، چي د أمير المؤمنین حفظه الله تعالی د فرمان او توصيو پاتي برخي به د را روانو دوو ورځو په بهیر کي ګډونوالو ته بشپړ تشریح سي.
