هلمند پوهنتون کي د لوی اختر سنتونو، آدابو او عباداتو په اړه روزنیز سمینار ترسره سو
د هلمند پوهنتون په مسجد کي د دعوت او ارشاد آمریت له لوري د لوی اختر د سنتونو، آدابو او د اختر لمونځ په اړه یو روزنیز سمینار وړاندي سو.
یاد سمینار، چي په کښې ګڼ شمېر استادانو او اداري کارکوونکو ګډون کړی وو. د دعوت او ارشاد آمریت امر ښاغلي مولوي عبدالقیوم ذاکر صاحب لخوا وړاندي سو. مولوي ذاکر صاحب د سمینار په مطالبو کي د لوی اختر، د دینی ارزښت، د حضرت ابراهیم علیه السلام د قربانۍ فلسفې، ادابو، سنتونو او د اختر د لمانځه طریقې په اړه خبري وکړې. هغه وویل، چي لوی اختر د مسلمان امت لپاره یو ستر عبادت او د قربانۍ یو ویاړلی سنت دی. دا ورځ د خوښۍ او یووالي ده، چي مسلمانانو ته د اطاعت او پرهیزګارۍ درس ورکوي.
نوموړي ګډونوالو ته د اختر د ورځي سنتونو لکه غسل کول، خوشبويي کارول، نوي جامې اغوستل، د عیدګاه لمانځه تر ادا کولو مخکي خوراک نه کول، دعاوي، تکبیرونه او د اختر د خطبې اورېدو اهمیت هم بیان کړ.
دغه راز مولوي ذاکر صاحب زیاته کړه چي د اختر ورځ یواځي د ظاهري خوښۍ ورځ نه ده، بلکي د عاجزۍ، نرمۍ او زغم ورځ ده. هغه ګډونوالو ته سپارښتنه وکړه، چي په دې مبارکو ورځو کي باید شخړي پرېښودل سي، یو له بله سره خفګانونه پای ته ورسول سي او د کورنۍ غړو او دوستانو تر منځ د میني او خوښۍ فضا عامه سي.
د سمینار په وروستۍ برخه کي، ګډونوالو خپلي پوښتني مطرح کړې، چې د ښاغلي مولوي ذاکر صاحب له لوري ورته ځوابونه وړاندي کړل سوه.
