.له زده کړو وروسته د مسؤلیت پرېښودلو شرعي مکلفیت او ټولنیز زیان په اړه اصلاحي سمینار وړاندي سو
نن د هلمند پوهنتون په مرکزي مسجد کي د دعوت او ارشاد آمریت له لوري له زده کړو وروسته له مسؤلیته پر شا کيدو شرعي ارزونه او ټولنیز تاوان پر موضوع اصلاحي سمینار ترسره سو. دغه سمینار د دعوت او ارشاد آمر مولوي عبدالقیوم ذاکر صاحب له خوا وړاندي سو، چي په کښې ددې پوهنتون استادانو، اداري کارکوونکو او خدماتي همکارانو ګډون کړی وو.
د دعوت او ارشاد آمر محترم مولوی عبدالقیوم ذاکر صاحب لمړی د موضوع په اړه یوه لنډه مقدمه وړاندي کړه، نوموړي ، د زده کړي بهیر شخصي چاره نه بلکي د ټولني ګډ امانت او مسؤلیت وباله. هغه وویل، اداره د استادانو او کارکوونکو د لوړو زده کړو او ظرفیت لوړولو لپاره امکانات برابر کړي، په حقیقت کي لوی احسان او پراخ اعتماد ورباندي کوي. له همدې امله د دې احسان قدرداني، وفاداري او د مسؤلیت ساتنه هم شرعي مکلفیت او هم اخلاقي اړتیا ده.
محترم ذاکر صاحب علم امانت وباله او د الله جل جلاله دا قول یې بیان کړ، الله ج هر علم چي انسان ته ورکړی، هغه د ټولني د خیر او اصلاح لپاره امانت ګڼي. د دې علم پټول یا د خلکو د لارښووني لپاره نه کارول، د امانت خیانت دی.
مولوي ذاکر صاحب په خپلو خبرو کي څرګنده کړه، چي ځیني کسان د ادارې د امکاناتو په مرسته خپل تحصیل بشپړوي، خو د زده کړو له پای ته رسېدو وروسته د شخصي مقاصدو لپاره له ادارې څخه ځان جلا کوي او مسؤلیت پرېږدي، چي دا کار یوازي په اداره کي ستونزي نه زېږوي، بلکي د شریعت له نظره د امانت او احسان د حق نه ادا کول بلل کيږي. هغه وویل چي د ادارې له لوري برابر سوي فرصتونه د ملت امانت دی او ورته وفادار پاتي کېدل، د مسؤلیت اداء کول او د خلکو خدمت کول د هر فرد لازمه دنده ده.
په سمینار کي دا هم وویل سول، چي د مسؤلیت پرېښودل د ادارې د کادر د کمښت، د محصلینو د زده کړو د ضعیفېدو او د ټولني د پرمختګ د ورو کېدو سبب ګرځي. په داسي حال کي چي ټولنه او تعلیمي ادارې په دې وخت کي متخصصو، باصلاحیته او ژمنو کسانو ته جدي اړتیا لري.
د سمینار په پای کي وویل سوه، چي د زده کړو ریښتینی قدر هغه مهال څرګندیږي، چي انسان یې ثمره په خپله اداره او ټولنه کي وکاروي او د ورکړل سوو فرصتونو وفاداري وکړي او د امانت مسؤلیت په اخلاص ادا کړي.
