.په هلمند پوهنتون کي د دعوت او ارشاد آمریت له لوري ستر علمي او فکري سمینار ترسره سو
په هلمند پوهنتون کي د یاد پوهنتون د دعوت او ارشاد آمریت له خوا د بېلابېلو پوهنځیو محصلانو ته یو ستر علمي او فکري سمینار ترسره سو، چي موخه یې د محصلانو د فکري پوهاوي پیاوړتیا، د معاصري ټولني د مهمو دیني او سیاسي موضوعاتو تشریح او د محصلانو ذهني روزنه وه.
یاد سمینار چي څلو ورځي به دوام وکړي او د پوهنتون ټول محصلین به په نوبتي شکل ورڅخه برخمن سي، په لومړۍ ورځ پکښې د ښووني او روزني، انجنیري او شرعیاتو پوهنځیو سلګونه محصلانو ګډون کړی و.
سمینار د معمول سره سم د قرآن کریم په تلاوت سره پیل سو.
وروسته شیخ الحدیث و التفسیر مولوي عبدالحمید صاحب د "احزابو پېژندنه او د هغوی نقصانات" تر عنوان لاندي وینا وکړه. نوموړي د بېلابېلو فکري او سیاسي ډلو تعریف وړاندي کړ او ویې ویل چي د اسلامي امت ترمنځ بې ځایه حزبي تعصبونه د تفرقې، اختلاف او کمزورۍ لامل ګرځي.
هغه پر دې ټینګار وکړ چي اسلامي وحدت، اخلاص او د دین پر اساسي اصولو راټولېدل د امت د بریا یوازینۍ لار ده.
ورپسې شیخ الحدیث و التفسیر مولوي محب الله صاحب د "په اسلام کي د شرعي امیر د ټاکلو طریقې، د خلکو مسؤلیت او د اسلامي او جمهوري نظامونو تعریف او توپیرونه" په اړه هر اړخیزه وینا وکړه. نوموړي څرګنده کړه چي په اسلام کي د امیر ټاکل یو شرعي اصل دی، چي د اهل حل او عقد له لاري تر سره کیږي او پر خلکو لازمه ده چي د شرعي قیادت اطاعت وکړي.
نوموړي همداراز د اسلامي نظام بنسټیز اصول تشریح کړل او ویې ویل، چي اسلامي نظام د وحي پر اساس ولاړ دی، حال دا چي جمهوري نظامونه د بشري نظریاتو محصول دي.
په همدې لړ کي شیخ الحدیث و التفسیر مولوي عبدالرحمن صاحب د "د الله تعالی پر ځمکه د الهي احکامو د تنفیذ اهمیت" تر عنوان لاندي وینا وکړه. نوموړي وویل چي د الهي احکامو عملي کېدل د ټولني د عدل، امنیت او فلاح ضمانت کوي. هغه زیاته کړه چي هر مسلمان مسؤلیت لري تر څو د الله تعالی د شریعت د حاکمیت لپاره کار وکړي او په خپل ژوند کي یې عملي کړي.
وروسته شیخ الحدیث و التفسیر مولوي محمد ولي صاحب د "امر بالمعروف او نهي عن المنکر ارزښت او په اسلام کي د مخدره توکو د استعمال نقصانات" تر عوان لاندي وینا وکړه.
نوموړي امر بالمعروف او نهي عن المنکر د مسلمانانو د غوره والي معیار و باله او زیاته یې کړه، چي د بدیو منعه او پر نېکیو امر کول د هر مسلمان وظیفه ده.
هغه همداراز مخدره توکي یو مهلک او حرام توکي یاد کړه، چي د انسان د فزیکي ضعف سره سره، دیني او معنوي ضعف هم ورسره یو ځای وي.
د سمینار په وروستۍ برخه کي د یاد پوهنتون د دعوت او ارشاد آمر، محترم مولوي عبدالقیوم ذاکر صاحب د "تقلید پېژندنه، د امام ابو حنیفه رحمه الله د مذهب ترجیح او په اسلام کي د ږیري اهمیت" په اړه تفصیلي وینا وکړه.
نوموړي تقلید د عامو خلکو لپاره یو شرعي ضرورت و باله او د امام ابو حنیفه رحمه الله د مذهب علمي بنسټونه او امتیازات یې بیان کړل. هغه همداراز د ږیري د اهمیت په اړه وویل چي ږیره د اسلامي هویت څرګند نښه ده او ساتل یې د سنتو د جملې څخه دي.
یاد سمینار د محصلانو له تود هرکلي او پوره توجه سره پای ته ورسېد او ګډونوالو دا ډول علمي پروګرامونه د فکري اصلاح، دیني پوهاوي او ټولنیز شعور د لوړولو لپاره ډېر ارزښتناک وبلل.
د یادوني وړده چي پر یادو موضوعاتو به راتلونکو ورځو کي هم په بېلا بېلو وختونو کي د هلمند پوهنتون د پاته پوهنځیو محصلینو ته علمي سمینارونه تر سره سي.
سمینار په دعائیه وینا سره پای ته و رسېدی.
