د اکاډمیکو همکاریو او اړیکو د پیاوړتیا په موخه د هلمند پوهنتون او ډایکندي د لوړو زده کړو مؤسسې ترمنځ دوه اړخیزه تفاهم لیک لاسلیک سو
د دوه اړخیزه همکاریو تفاهم لیک د هلمند پوهنتون د رئیس شيخ مولوي حافظ محمد نسيم حقاني او ډایکڼدي د لوړو زده کړو مؤسسې د رئیس انجینر محمد ناصر حنظله ترمنځ د کوربه پوهنتون د رهبرۍ غړو د مالي او اداري چارو مرستيال ډاکټر سميع الله سعيد او د علمي چارو مرستيال پوهنيار محمد نعيم دوست او د انستو پوهنتون د اداري چارو مرستيال انجينر عزيزالله اماني په حضور کي لاسلیک سو.
د ياد رسمي تفاهم لیک د لاسلیک په بهیر کي دواړو لوریو خوښې څرګنده کړه او زیاته یې کړل، چي د نوموړي تفاهم لیک په اساس به د پوهي او سرچینو تبادله ، د مشترکو څيړنیزو پروژو د پلي کولو او په ځانګړي ډول د اړوندو پوهنځیو علمي او اداري تجربو په ښه توګه شریکولو اسانتیا رامنځته سي.
د یادولو وړ ده، چي مخکي هم هلمند پوهنتون د اکاډمیکو همکاریو په موخه دوه اړخیزه تفاهم لیکونه د البیروني پوهنتون او فراه پوهنتون سره لاسلیک کړي دي.
هیره دي نه وي، چي د ډایکنډي د لوړو زده کړو مؤسسې رئیس انجینر محمد ناصر حنظله، د انستو پوهنتون د اداري چارو مرستیال انجینر عزیزالله اماني په داسي حال کي چي د هلمند پوهنتون د مالي او اداري چارو مرستیال داکټر سمیع الله سعید یې ملتیا کول، د هلمند پوهنتون د اداري چارو،کمپیوټر لیب،کتابتون، لابراتوارونو او همدا راز د ګڼو نورو پروژو چي دا مهال یې کار روان دی، لیدنه وکړل.
یکشنبه
1402/11/15ه.ل کال
د عامه پوهاوي او نشراتو مديريت
