.د تکبر، حسد او بغض د اضرارو په اړه اصلاحي سمینار وړاندي سو
نن د هلمند پوهنتون په مسجد شریف کي د دعوت او ارشاد آمریت له لوري د "تکبر، حسد او بغض" تر عنوان لاندي یو علمي او دیني سمینار ترسره سو، چي په کښې د پوهنتون استادانو، اداري او خدماتي کارکوونکو ګډون کړی و.
د سمینار په پیل کي د دعوت او ارشاد آمریت مبلغ او مؤذن محترم مولوي محب الله الجمالي صاحب علمي وینا وکړه. نوموړي د خپلي وینا په پیل کي د الله جل جلاله د ذات، قدرت او کمالاتو په اړه هر اړخیز بیان وړاندي کړ او ویې ویل چي الله جل جلاله قادرِ مطلق ذات دی، په هر څه قادر دی او دا نه خوښوي چي څوک د هغه په ذات، صفاتو او افعالو کي شریک وګرځول سي. هغه زیاته کړه چي توحید د اسلام بنسټیز اصل دی او هر ډول تکبر او ځان ستاینه په حقیقت کي د توحید له روحیې سره په ټکر کي ده.
محترم الجمالي صاحب د وینا په بله برخه کي د انسان د فکري او ابدي دښمن یادونه وکړه او ویې ویل چي انسان تل د داسي پټ دښمن سره مخ دی، چي هره لحظه ورته په کمین کي ناست وي او د حسد، بغض او تکبر له لاري هڅه کوي د انسان ایمان، اخلاق او ټولنیز نظم زیانمن کړي. هغه دا رذیله صفات د ټولني لپاره خطرناک فکري او اخلاقي ناروغۍ وبللې، چي د افرادو ترمنځ بې باوري، دښمني او تفرقې ته لاره هواروي.
نوموړي د موضوع د لا ښه روښانتیا لپاره د فرعون د تکبر تاریخي مثال وړاندي کړ او واضح یې کړه چي فرعون د خپل قدرت او ظاهري ځواک له امله ځان لوړ وباله، د حق څخه یې انکار وکړ او پایله یې د دنیا او آخرت رسوایي وه.
نوموړي پر عاجزۍ، تقوا، ورورولۍ، یو بل ته درناوی پر درناوي ټینګار وکړ او د حسد او بغض څخه یې د ځان ساتني په اړه مهمي مشورې وړاندي کړې.
