د 'لوی اختر مسایل' تر عنوان لاندي د پوهاوي سمینار وړاندي سو
نن سې شنبه د هلمند پوهنتون د غونډو په تالار کي د مسلکي پراختیا مرکز په همکارۍ د دعوت و ارشاد آمریت له لوري د 'لوی اختر مسايل' تر عنوان لاندي د پوهاوي سمینار وړاندي سو
په یاد سمینار کي چي د هلمند پوهنتون د ګڼو پوهنځیو رئیسانو، علماؤ، استادانو او اداري کارمندانو ګډون درلود، د نوموړي پوهنتون د دعوت و ارشاد امر ښاغلي مولوي عبدالقیوم ذاکر له لوري د لوی اختر مسایلو د پوهاوي سمینار وړاندي کړ. ښاغلي ذاکر صاحب د اختري او ذکات پر توپير او د لوی اختر قربانۍ د مسايلو پر ګڼو برخو خبري وکړي
هغه وویل: " چي قرباني د اختر په اولو درو ورځو کي کیږي او د قربانۍ لپاره په ژبه نیت ویل ضروري نه دي؛ خو په زړه کي به دا وي، چي قرباني کوم او دقربانۍ د حلالولو پر مهال (بسم الله الله اکبر) ویل ضروري او سنت دي
" نوموړي د قربانۍ څارویو د ډولونو او ځانګړتیاوو په اړه معلومات وړاندي کړل او د اختري لپاره د افرادو د مالي نصاب د پوره کېدو حدود واضح کړل. دغه راز هغه زياته کړه: " هغه کسان چي تر اصلي اړتیاوو ور هاخوا توکي / مال ولري، چي نصاب پوره کړي، قرباني ورباندي لازمیږي."
د سمینار په وروستیو کي د ګډونوالو پوښتنو ته ځوابونه وویل سول او د دعا په ویلو سره سمینار پای ته ورسېدی
نېټه: ۲۷/۱۱/۱۴۴۵ هـ.ق کال
هلمند پوهنتون
د عامه پوهاوي او نشراتو لوی مدیریت
