.هلمند پوهنتون کي د برېښنايي اداینو د پراختیا په اړه معلوماتي سمینار وړاندي سو
نن، د هلمند پوهنتون د امام خطابي بستي رحمه الله تالار کښې د مسلکي پرمختیا آمریت په همکارۍ د برېښنايي اداینو د پراختیا لارښود تر عنوان لاندي معلوماتي سمینار وړاندي سو. چي پر مهال یې د اقتصاد پوهنځي رئیس، استادانو او اداري کارمندانو ګډون کړی و.
سمینار د اقتصاد پوهنځي استاد، نوماند پوهنیار محیب الله آمیني لخوا پیل سو. نوموړي په خپلو څرګندونو کي د برېښنايي تادیاتو پر اهمیت او ګټو خبري وکړې او ویې ویل چي برېښنايي تادیات د مالي شفافیت د لوړوالي، د اداري فساد د کمښت، د معاملاتو د چټکتیا، د وخت او لګښت د سپما، او د مالي سیستم د عصري کيدو سبب ګرځي.
هغه زیاته کړه چي په افغانستان کي د برېښنايي پیسو کارونه ورځ تر بلي پراخېږي او خلک هڅول کيږي چي د نغدو پیسو پر ځای له ډیجیټلي وسیلو څخه استفاده وکړي. نوموړي د موبایل ماني، بانکي کارتونو، او انلاین تادیاتي سیستمونو یادونه وکړه او دا یې د اقتصادي ودي لپاره مهم ګام وباله.
همدارنګه، د برېښنايي پیسو د ترویج لپاره ځینو موضوعاتو ته اشاره وکړه ، چيپه کښې د عامه پوهاوي پروګرامونه، د بانکي خدماتو پراختیا، د ټکنالوژۍ کارول، او د دولتي او خصوصي سکتور ترمنځ همغږي شامل وه.
ښاغلي آمیني د الکترونیکي بانکوالۍ اهمیت ته په اشارې سره وویل، چي دا سیستم د مالي خدماتو لاسرسی اسانه کوي، د لیري پرتو سیمو خلکو ته د بانکي خدماتو زمینه برابروي، او د نړیوال مالي نظام سره د افغانستان د نښلولو زمینه مساعدوي.
سمینار په دعائیې سره پای ته ورسېد.
