هلمند پوهنتون کي د ټولنیزي مسلمانۍ بېلګي او زموږ مسؤلیتونه تر سرلیک لاندي اصلاحي سمینار وړاندي سو.
نن د هلمند پوهنتون په مرکزي مسجد شریف کي د یاد پوهنتون د دعوت او ارشاد آمریت له لوري د پوهنتون همکارانو ته د "ټولنیزي مسلمانۍ بېلګي او زموږ مسؤلیتونه" تر سرلیک لاندي یو مهم او اصلاحي سمینار وړاندي سو.
یاد سمینار د دعوت او ارشاد آمر، الحاج مولوي عبدالقیوم "ذاکر" صاحب له لوري وړاندي سو، چي په ترڅ کي یې د قرآني آیاتونو او نبوي احادیثو په رڼا کي د ټولنیزي مسلمانۍ بېلابېلي بېلګي تشریح کړې.
نوموړي ګډونوال د ټولنیز شعور پیاوړتیا، د یو بل سره د همدردۍ او متقابل لاسنیوي پر لور وهڅول.
ښاغلي ذاکر صاحب د وینا پر مهال د افغاني ټولني هغه اساسي ضعفونه هم یاد کړل، چي د ده په وینا، بې علمي، فقر، معلولیت او بې وزلي د ټولني د کمزورۍ له مهمو لاملونو څخه دي او زیاته یې کړه چي مؤمنان باید د ټولنیزي مسلمانۍ له اصولو سره سم د دغو ستونزو د مخنیوي لپاره عملي ګامونه واخلي.
نوموړي د نبوي حدیث "من کان في حاجت أخیه، کان الله في حاجته" په استناد وویل، چي مؤمنان باید د یو بل د اړتیا پر مهال یو د بل ملتیا وکړي. هغه ټینګار وکړ، چي موږ مسؤلیت لرو د ټولني په اقتصادي ستونزو کي خپل رول ادا کړو، د اړمنو خلکو لاسنیوی وکړو، د تجارت او حلال کسب لاري ورته برابري کړو او خپلي صدقې مستحقو کسانو ته وسپارو.
محترم ذاکر صاحب د مادي فقر تر څنګ د روحاني فقر یادونه هم وکړه او ویې ویل، چي روحاني فقر د مادي فقر په پرتله ډېر خطرناک دی. د ده په وینا، دا فقر هغه مهال رامنځته کیږي، کله چي انسان د الله تعالی د ذکر څخه غافل سي، په اعتقاداتو کي تردد پیدا کړي، پر ګناهونو توبه ونه باسي او په اخلاقي فساد کي ښکېل سي.
نوموړي پر استادانو غږ وکړ، چي خپل زده کړیالان د روحاني فقر څخه وژغوري، هغوی ته د نېکو لاروښوونه وکړي او د بدیو څخه یې منعه کړي، تر څو یوه سالمه، بااخلاقه او مسؤوله ټولنه رامنځته سي.
سمینار په دعائیه وینا سره پایته و رسېدی.
