د دريو پوهنځيو علمي او اداري فعاليتونه د معيارونو له مخي وارزول سول.
د پوهنځیو د ارزونو په دوام، نن سې شنبه د هلمند پوهنتون رئیس، شیخ الحدیث و التفسیر مفتي محمد شریف الله ابو احمد صاحب او مرستیالانو، د دې پوهنتون د کرهڼي، اقتصاد او وترنري پوهنځیو څخه لیدنه وکړه او د یادو پوهنځیو علمي او اداري چاري یې له نږدې وارزولې.
د ارزوني پر مهال د یادو پوهنځیو د حاضرۍ او ثبت کتابونه، راپورونه، کاري پلانونه، پرېکړي، اجنډاوي او نور اړوند اسناد وکتل سول او د چارو د تنظیم ترڅنګ د تدریسي بهیر څرنګوالی هم په دقت سره وارزول سو.
ښاغلي ابو احمد صاحب د يادو پوهنځیو له مسؤلینو څخه مننه وکړه او ویې ویل چي یاد پوهنځي د ټولني په اقتصادي وده، ځان بسیا کېدو او د حیواني سکتور په پرمختګ کي بنسټیز او حیاتي رول لري. نوموړي ټینګار وکړ چي د دې پوهنځیو استادان او مسؤلین باید د علمي تدریس ترڅنګ د محصلانو عملي مهارتونو، مسلکي وړتیاوو او د نوښتګر فکر په پیاوړتیا کي جدي پاملرنه وکړي، څو داسي کدرونه وروزل سي چي د کرهڼي د عصري کولو، د تولیداتو د زیاتوالي، د حیواني روغتیا د ښه والي او د چاپيريال د ساتني په برخو کي اغېزمنه ونډه واخلي او د هيواد د پرمختګ او سوکالۍ لپاره عملي خدمتونه ترسره کړي.
بايد وويل سي، چي دا ډول ارزوني د علمي چارو د لا پیاوړتیا او د پوهنتون د اداري او تدریسي بهیر د ښه والي په موخه ترسره کيږي.
