.هلمند پوهنتون د نشه يي توکو د مخنیوي ملي کنفرانس ته کوربه توب کوي
له نشه توکو پاک افغانستان ملي کنفرانس د نږدې کېدو په درشل کي، چي د هلمند پوهنتون له لوري د عامه پوهاوي په پار د ښار په ګڼو ساحو کي تبلیغاتي لوحې نصب سوې.
دغه ملي کنفرانس به د روان کال د عقرب میاشتي پر ۵مه، ۶مه او ۷مه نېټه د هلمند پوهنتون په کوربه توب ترسره سي، چي د هیواد له ګوټ ګوټ څخه به دینی علماء کرام، د پوهنتونونو استادان، متخصیصین، پوهان، استادان او د دیني مدارسو استازي ګډون ولري.
د هلمند پوهنتون د اړیکو او عامه پوهاوي آمر مولوي عبدالباري حنظله وایي، چی د یاد کنفرانس موخه دا ده، څو د نشه يي توکو د مخنیوي په برخه کي د دیني نصوصو، علمي څېړنو، ټولنیزو واقعیتونو او د بدیل معیشت د لارو چارو په اړه پراخ بحثونه او علمي مقالې وړاندي سي، چي په دې سره به د مخدره موادو د روحي، فکري، اقتصادي او کورنۍ اغېزو، د هغوی د له منځه وړلو حل لاري او د دولت او ولس د ګډ مسئولیت لاري چاري لا څرګندي سي.
