.په هلمند پوهنتون کي د علماء کرامو د سويې د تثبیت ازمویني لپاره د بایومټریک د ثبت لړۍ پیل سوه
نن د هلمند پوهنتون په انګړ کي، د پوهني وزارت اړوند د اسلامي تعلیماتو په برخه کي ، د ازمویني ملي ادارې له لوري د علماء کرامو ثانویه او مافوق الثانویه سويې د تثبیت امتحان لپاره د بایومټریک معلوماتو د ثبت لړۍ پیل سوه، چي مشري يې د یادي ادارې استازى ښاغلی عبدالرحمان رحماني کوي.
ښاغلي رحماني د ګډونوالو په اړه وویل، چي د هلمند ولایت څخه (۷۹۵ ) تنه علماء کرام په دې ازموینه کي د ګډون لپاره نوم لیکنه کړې ده. د ده په وینا، ګډونوال د یو منظم سیستم له مخي خپل بایومټریک معلومات ثبتوي، تر څو د ازمویني په ورځ له هر ډول ستونزو او ځنډ پرته په ټاکلي ډول ګډون وکړي.
نوموړي زیاته کړه، چي د ازمویني ملي ادارې د غړو له خوا ګډونوالو ته د امتحان اړوند هر اړخیزه لارښوونه روانه ده او د دې هڅه کیږي، چي د شفافیت ترڅنګ ټولي چاري په ښه ډول پر مخ ولاړي سي.
د یادوني وړ ده، چي د بایومټریک د ثبت روانه لړۍ د سبا (جمعي) ورځي د ازمویني لپاره چمتووالی دی، چي په لړ کي به یې د ګډونوالو د علمي سويې کچه وازمایل سي.
