.په هلمند پوهنتون کي د وزارتونو او امارتي ادارو د عقدونو قانون د انفاذ په اړه دوه ورځنی سمینار پیل سو
نن د هلمند پوهنتون د غونډو په تالار کښي، د أمیر المؤمنین "حفظه الله و رعاه" د ۲۳ ګڼه فرمان پر بنسټ د وزارتونو او امارتي ادارو د عقدونو قانون د انفاذ د تشریح دوه ورځنی سمینار پیل سو، چي پر مهال یې د پوهنتون رهبرۍ، د پوهنځيو رئیسانو او امیرینو، استادانو، اداري کارکوونکو او خدماتي همکارانو ګډون کړی و.
د سمینار په پیل کي د هلمند پوهنتون رئیس، شیخ الحدیث و التفسیر مفتي محمد شریف الله "ابو احمد" صاحب د أمیرالمؤمنین "حفظه الله" د تقوا، دیانت او لوړ شخصیت په اړه خبري وکړې. نوموړي د هغه د مشرۍ ځانګړتیاوي او د مسلمه أمت سره د هغه خوا خوږۍ په اړه مفصل بیان وړاندي کړ. ګډونوالو ته یې په اسلامي نصوصو کي د أمیر د اطاعت اهمیت روښانه کړ او هغوی یې د فرمان د اطاعت لپاره وهڅول.
وروسته محترم ابو احمد صاحب د وزارتونو او امارتي ادارو د عقدونو قانون د انفاذ په اړه د أمیر المؤمنین "حفظه الله" ۲۳ ګڼه فرمان شرحه او تفصیل وړاندي کړ.
یاد قانون چي په ۲ بابه، ۴ فصلونو او ۴۰ مادو مشتمل دی، د اسلامي شریعت او اداري اصولو پر بنسټ د بیع سلم، بیع بالتقسیط، اجاره، استصناع او شرائطو څرنګوالی بیانوي.
د سمینار په بهیر کي د هلمند پوهنتون رئیس د یاد قانون د تطبیق پر اهمیت ټینګار وکړ او ګډونوالو ته یې ډاډ ورکړ، چي د دې قانون په پلي کولو سره به په ادارو کي شفافیت او سمون رامنځته سي او اساسي ستونزي به حل او فصل سي.
یاد قانون د هلمند پوهنتون رهبرۍ لخوا څو ورځي وړاندي و اړوند ادارو ته د مطالعې په پار تکثیر سوی وو، چي د سمینار لومړۍ برخه یې نن وړاندي سوه او پاتي برخه به یې سبا هم دوام وکړي او د قانون د نورو مادو تشریح او د عملي لارښوونو په اړه به یې هم خبري وسي.
