د هلمند پوهنتون او میرویس خان نیکه زابل د لوړو زده کړو موسسې ترمنځ د ګډو همکاریو هوکړه لیک لاسلیک سو
نېټه: ۹/۵/۱۴۴۶ هـ.ق
نن دوشنبه، د هلمند پوهنتون د ریاست په انګړ کي د هلمند پوهنتون د رئیس شیخ الحدیث مولوي حافظ محمد نسیم "حقاني" او د میرویس خان نیکه زابل د لوړو زده کړو موسسې د رئیس الحاج روح الله "مشال" ترمنځ د مشترکو همکاريو په موخه تړون، د دواړو پوهنتونونو رهبرۍ او استازو په حضور کي لاسلیک سو.
د هوکړې په اساس، دواړه پوهنتونونه به په ګډو څېړنیزو ساحو کي په ګروپي ډول تحقیقات ترسره کوي، د اړتیا په صورت کي به د یو بل منابعو او وسایلو څخه ګټه پورته کوي او همدارنګه به په علمي او اداري برخو کي ورکشاپونه او روزنیز پروګرامونه دایروي.
د دواړو پوهنتونونو هدف د علمي همکاریو پراختیا او په څېړنیزو پروژو کي لا نور پرمختګ دی. چي له مخي به یې د زده کړو او څېړنو په برخو کي نوي لاري پرانیستل سي.
په دې تړاو نور هوکړه لیکونه هم هلمند پوهنتون کړي، چي تر ټولو وروستى یې د غزني تخنیکي پوهنتون سره وو.
