هلمند پوهنتون کي د ۱۴۰۳ تحصيلي کال د درسي بهير پیل غونډه وسول

نېټه: ۱۴۴۶/٣/۴ هــ ق

نن د هلمند پوهنتون د غونډو تالار کښې د ۱۴۰۳ تحصيلي کال د درسي بهير د پیلېدو په موخه د دې پوهنتون د رهبرۍ، استادانو، اداري کارمندانو او محصلینو په ګډون غونډه وسول.

غونډه د قرانکریم د څو مبارکو آیتونو په تلاوت پیل سوه، په سر کښې د هلمند پوهنتون رئیس ښاغلي شيخ مولوي حافظ محمد نسیم حقاني د تحصيلي کال د پیل او نوو راغلو زده کړیالانو ته د مبارکۍ مراتب وړاندي کړل. ښاغلي حقاني وويل لوړي زده کړي انګېزه بخښونکي دي، د ترلاسه کولو لپاره یې عالي همت، لویه حوصلې، ښه چلند او ټینګي ارادې ته اړتیا ده. نوموړي محصلینو ته په خطاب کي و ویل: دا د شکر ځای دی، چي نن مستعد او متخصص استادان ستاسو د روزني لپاره په دې علمي بنسټ کي ګډون لري او سبا به بیا تاسي د دوی په څېر د نورو د روزني مسؤلیت په غاړه لرئ، نو په کار ده چي له ځانه بشپړ با استعداده اشخاص جوړ کړئ او د تخنیکي او حرفوي زده کړو تر څنګ، ځانونه په روحاني او عقیدوي علومو سمبال کړئ.

وروسته د یاد پوهنتون د محصلانو چارو مرستیال محترم مفتي صدیق الله همت محصلانو ته ډاډ ورکړ، چي د تدریسي بهير د پیل لپاره لازم چمتوالی نيول سوی او ټول هغه توکي چي د درسي چاپیریال لپاره اړین دي، له مخکي نه چمتو سوي دي. ښاغلي همت محصلانو ته د ځوانۍ او د وخت څخه د سمي ګټي اخیستني په اړه ارزښتناکه سپارښتني وکړې.

د غونډي په وروستيو کي د نوموړي پوهنتون د دعوت او ارشاد امر محترم مولوي عبدالقيوم ذاکر محصلان نیکمرغه وبلل، چي لوړو زده کړو ته یې لار موندلې او اسلامي ټولني ته د خدمت لپاره ښوونه او روزنه ترلاسه کوي. ښاغلي ذاکر په خپلو خبرو کي وویل، اسلام  د سالم عقل انسانان د ځوانۍ له مرحلې مکلف ګرځوي او په اخرت کي هم د یادي دورې پوښتنه ترې کیږي، چي د دین او اسلامي ټولني  د خدمت لپاره یې څه کړي دي.

هغه له زده کړیالانو غوښتنه وکړل، چي د نړۍ په هر ګوټ کي  باید د اسلام ښه استازولي وکړئ او په اسلامي او عصري علومو کي بشپړه پوهه ترلاسه کړي.