.هلمند پوهنتون کي د کډوالو او بیرته راستنېدونکو چارو وزیر د شهادت په پار دعا وسوه
نېټه: ۱۰/۶/۱۴۴۶ ه.ق
تېره ورځ د افغانستان د کډوالو او بیرته راستنېدونکو چارو وزیر الحاج خلیل الرحمن حقاني د یوه بزدلانه ځان وژونکي برید له کبله د شهادت لوړ مقام ته ورسید. د برید پر مهال نوموړی د جماعت لمانځه ته حاضر سوی وو.
د هلمند پوهنتون د غونډو تالار کښې د دې پوهنتون د رهبرۍ، استادانو او اداري کارکوونکو لخوا د نوموړي د روح د ارامښت لپاره دعا وسوه. د غونډي په ترڅ کي ټولو ګډونوالو لاسونه لپه کړل او د الله (ج) له دربار څخه يې د شهید لپاره د فردوس جنت غوښتنه وکړه.
په همدې مناسبت د دعوت او ارشاد آمر مولوي عبدالقیوم ذاکر هم خپله وینا وکړه. هغه وویل چي دا بریدګر خوارج دي او د اسلام د تاریخ له پیل څخه دغسي افرادو تل د مسلمانانو ترمنځ د نفاق او ویرې خورولو هڅي کړي دي. هغه زیاته کړه چي خوارجو تل مسلمانان په ناحقه وژلي او د اسلامي امت یووالی يې زیانمن کړی دی.
مولوي ذاکر ټینګار وکړ چي دغسې بزدلانه بریدونه د افغان جهاد پروره ملت ارادې نسي کمزوري کولی. نوموړی زیاتوي، افغان مېړني ملت تل د خپل وطن د ساتني لپاره قربانۍ ورکړي او په راتلونکي کي به هم د خپل هیواد د ساتنې لپاره چمتو وي. هغه وویل چي د افغانستان تاریخ د سرښندنو او قربانیو شاهدي ورکوي او افغان ولس به د دښمنانو پر وړاندي تل په یوه صف کي ولاړ وي.
په پای کي ګډونوالو د شهید الحاج خلیل الرحمن په یاد دعا وکړه او د الله جل جلاله له لوی درباره ورته د جنت فردوس غوښتنه وسول.
